Muja takohet me Totschnig në Vjenë, flet për integrimin evropian të bujqësisë
Në takim u diskutuan reformat në bujqësi dhe harmonizimi i Kosovës me standardet e Bashkimit Evropian.
VJENË — Ministri në detyrë i Bujqësisë, Pylltarisë dhe Zhvillimit Rural, Armend Muja, u prit në një takim zyrtar në Vjenë nga ministri federal austriak për Bujqësi, Pylltari, Klimë dhe Menaxhim të Ujërave, Norbert Totschnig. Në fokus ishin forcimi i bashkëpunimit dypalësh dhe avancimi i reformave në sektorin e bujqësisë.
Sipas njoftimit të ministrisë, në takim u diskutua për integrimin evropian të Kosovës dhe harmonizimin e politikave bujqësore me standardet e BE-së. Ministrat shkëmbyen përvoja për forcimin e kontrollit zyrtar të ushqimit, sistemet e paralajmërimit të hershëm kundër breshërisë, digjitalizimin e bujqësisë, si dhe bashkëpunimin ndërmjet instituteve kërkimore të dy vendeve.
Në fokus ishin edhe mundësitë për zgjerimin e bashkëpunimit institucional përmes shkëmbimit të ekspertëve, nëpunësve, studiuesve e studentëve. Muja falënderoi homologun austriak për mbështetjen e vazhdueshme ndaj Kosovës, duke thënë se partneriteti do të ndikojë në modernizimin e sektorit dhe përshpejtimin e përafrimit të Kosovës me standardet e BE-së.
Burim: Lajmi.net
— Redaksia ZHURMA