Muhamet Hyseni pëson lëndim muskular dhe pritet të mungojë gjashtë javë

Sulmuesi kosovar Muhamet Hyseni po përballet me vështirësi të njëpasnjëshme që nga transferimi i tij gjatë këtij sezoni te skuadra e Superligës rumune, Farul Constanța, në formë huazimi nga klubi danez AC Horsens. Fillimisht, përshtatja e tij në Rumani u shoqërua me pengesa të ndryshme, përfshirë pritjen për pajisjen me leje pune nga autoritetet rumune dhe periudhën e rëndë personale pas ndarjes nga jeta të babait të tij në muajin shtator.

Pasi kaloi këto sfida dhe debutoi si titullar me një paraqitje mjaft të mirë, futbollisti nisi të ndiente dhimbje në muskujt e barkut menjëherë pas përfundimit të takimit. Ky problem muskulor u konfirmua nga trajneri i ekipit, Ioan Sabau, gjatë konferencës për shtyp para ndeshjes kundër Otelul. Për shkak të këtij dëmtimi, lojtari do të mungojë për rreth gjashtë javë, duke ndalur hovin e tij në një moment kur kishte nisur të fitonte minutat e parë dhe të përshtatej me ambientin e ri sportiv.