Mozaiku i Tiranës digjitalizohet me teknologjinë Gigapixel
Ministri Blendi Gonxhja njoftoi se projekti përfshin rindërtimin e vilës romake dhe dokumentimin e parë të këtij lloji në vend.
TIRANË — Siti arkeologjik i Mozaikut të Tiranës ka hyrë zyrtarisht në epokën digjitale përmes një projekti të ri restaurimi, i cili ndërthur kërkimin shkencor me teknologjinë moderne. Ministri i Turizmit, Kulturës dhe Sportit, Blendi Gonxhja, vizitoi këtë hapësirë ku u prezantua zyrtarisht aktivizimi i teknologjive të reja për vizitorët.
Ky projekt inovativ përfshin tri risi kryesore që synojnë të bëjnë historinë më të aksesueshme për vizitorët. Ndër to janë rindërtimi tredimensional i vilës romake mbi gjurmët origjinale dhe instalacionet digjitale interaktive. Gjithashtu, për herë të parë në Shqipëri, po përdoret teknologjia Gigapixel për dokumentimin e sitit.
Sipas ministrisë, teknologjia Gigapixel do të aplikohet edhe mbi mozaikun e Eksonarteksit të Katedrales së Bylisit. Ndërhyrja e shndërron Mozaikun e Tiranës nga një sit me vëmendje të kufizuar në një hapësirë moderne interpretimi, ku ruajtja e trashëgimisë kulturore dhe inovacioni bashkëjetojnë në funksion të publikut të gjerë.
Burim: ATSH
— Redaksia ZHURMA
