Mickoski kundërshton provimin e jurisprudencës 100 për qind në shqip

Debati për dhënien e provimit të jurisprudencës në gjuhën shqipe në Maqedoninë e Veriut mbetet i pazgjidhur, pasi qëndrimet e krerëve qeveritarë nuk kanë bindur rreth 400 studentë shqiptarë nga Universiteti i Tetovës, Universiteti i Evropës Juglindore dhe Universiteti «Nënë Tereza». Kryeministri Hristijan Mickoski ka bërë të qartë se provimi nuk do të zhvillohet tërësisht në gjuhën shqipe, duke deklaruar se «nuk do të ketë kërkesë dhe as zgjidhje përmes së cilës provimi i jurisprudencës do të jepet në gjuhën shqipe». Sipas tij, vetëm pjesa teorike mund të jepet në gjuhën në të cilën kandidatët kanë përfunduar studimet, ndërsa pjesa praktike e simulimit të procedurave gjyqësore penale dhe civile duhet të zhvillohet në gjuhën maqedonase.

Ky qëndrim nuk përmbush kërkesën e studentëve, të cilët kanë dorëzuar peticion dhe kanë organizuar dy protesta për të kërkuar respektimin e Ligjit për Përdorimin e Gjuhëve dhe të drejtën për ta dhënë provimin plotësisht në shqip. Zëvendëskryeministri i parë, Bekim Sali, ka deklaruar se qeveria po punon për një zgjidhje që do të përfshijë edhe provimet e tjera profesionale, duke ia atribuar përgjegjësinë për situatën qeverisjes së kaluar dhe duke siguruar se zgjidhja është në përputhje me Kushtetutën. Nga ana e tij, ministri i Drejtësisë, Jeton Shasivari, pati propozuar që 84 për qind e provimit të zhvillohet në gjuhën shqipe, por studentët shprehen se ky propozim u vu në pikëpyetje nga kryeministri vetëm një ditë më vonë.

Përfaqësuesi i studentëve, Mevlan Ademi, ka theksuar se ata kërkojnë argumente të qarta juridike, përgjegjësi dhe afate konkrete, duke shtuar se «nuk kërkojmë zgjidhje të pjesshme, por të drejtën e plotë». Ademi ka shprehur shqetësimin se procesi, edhe në rastin më optimist, mund të zgjasë më shumë se një vit, ndërsa ka kundërshtuar edhe mundësinë që çështja të dërgohet në Komisionin e Venecias për shkak të vonesave që mund të sjellë.