Mexhiti inspekton asfaltimin e rrugës “Remzi Hoxha” në Sahat Kullë

Kryetari i Komunës së Çairit, Izet Mexhiti, ka inspektuar punimet për asfaltimin e një pjese të rrugës “Remzi Hoxha” në lagjen Sahat Kullë. Sipas komunës, punimet përfshijnë një sipërfaqe prej 850 metrash katrorë dhe vijnë si vazhdim i investimeve për përmirësimin e infrastrukturës rrugore në këtë zonë.

Para asfaltimit, të gjitha objektet në këtë pjesë të lagjes janë lidhur me sistemin e ri të ujësjellësit, ndërsa po zhvillohet edhe çaktivizimi i rrjetit të vjetër. Mexhiti deklaroi se pas përfundimit të këtyre punimeve do të vazhdojë asfaltimi dhe rregullimi i rrugëve të tjera në lagje dhe në gjithë Çairin.

Nga Komuna e Çairit njoftojnë se punimet infrastrukturore do të vazhdojnë edhe në rrugët e tjera të lagjes Sahat Kullë, me qëllim përmirësimin e infrastrukturës publike dhe krijimin e kushteve më të mira për banorët.