Meta do të njoftojë prindërit për kërkimet e adoleshentëve

Kompania Meta ka njoftuar se do të nisë t'i lajmërojë prindërit në rast se fëmijët e tyre adoleshentë bëjnë kërkime të vazhdueshme për vetëlëndimin ose vetëvrasjen. Kjo masë e re, që funksionon përmes mjeteve të mbikëqyrjes prindërore, synon të kapë herët situatat e rrezikut dhe t'u japë mundësi familjarëve që të ndërhyjnë në kohë për t'u ofruar mbështetje të miturve.

Sistemi përfshin aktivitetin në Facebook, Instagram, Messenger si dhe bisedat me inteligjencën artificiale Meta AI, ndërsa njoftimet do të dërgohen përmes emailit, mesazheve telefonike, WhatsApp-it apo drejtpërdrejt në aplikacion nëse regjistrohen kërkime të shumta brenda një kohe të shkurtër. Kompania ka bërë të ditur se mesazhet për prindërit nuk do të përmbajnë fjalët e sakta të kërkuara apo përmbajtjen e bisedave, por vetëm informacione për shqetësimin dhe udhëzime se si të flitet për këto tema.

Nisma vjen pas një sistemi të ngjashëm të prezantuar në Instagram, ndërsa kompania synon të shtojë mbrojtjen për përdoruesit e mitur duke u ofruar gjithashtu materiale dhe këshilla nga ekspertët.