Mbi 117,000 mërgimtarë regjistruar për votim, interes më i lartë se në dhjetor

PRISHTINË — Diaspora e Kosovës do të jetë e para që do të shprehë vullnetin e saj për zgjedhjet e parakohshme të 7 qershorit. Votuesit jashtë vendit që kanë zgjedhur të votojnë me postë do të mund ta përfundojnë procesin nga 25 maji deri më 6 qershor, ndërsa afati i regjistrimit skadon të dielën në mesnatë.

Sipas të dhënave të Komisionit Qendror Zgjedhor, deri në orën 10:00 të mëngjesit të së dielës janë pranuar mbi 117,000 kërkesa përmes platformës elektronike. Prej tyre, 99,498 janë miratuar, 7,621 janë refuzuar dhe mbi 10,000 presin shqyrtim. Nga aplikimet e aprovuara, 22,955 qytetarë janë regjistruar për votim fizik në misione diplomatike, 2,590 për dërgim të pakos së votimit në kutinë postare të KQZ-së në Kosovë, dhe 73,953 për dërgim në kuti postare jashtë vendit.

Kjo shifër tregon interes më të lartë se në zgjedhjet e 28 dhjetorit 2025, me mbi 22,000 të regjistruar më shumë. Gjermania kryeson me 49,102 votues të regjistruar, e ndjekur nga Zvicra me 23,456. Në listë janë edhe Franca (4,193), Suedia (3,750), Austria (3,165), Britania e Madhe (2,370), Italia (2,206), SHBA (2,070), Belgjika (2,024), Sllovenia (1,400), Norvegjia (1,154) dhe Finlanda (1,010).

Ish-kryetarja e KQZ-së, Valdete Daka, shpjegon rritjen me faktin se në dhjetor emigrantët ishin tashmë në Kosovë dhe votuan fizikisht, pa pasur nevojë të regjistroheshin si votues jashtë vendit. "Ky numër që tani duket i madh është fakti që diaspora zgjodhi të votonte me postë dhe jo fizikisht," tha ajo për RTV Dukagjini. Daka gjithashtu vlerësoi se afati i shkurtër për organizimin e zgjedhjeve nuk mjafton që KQZ-ja të eliminojë problemet e zbuluara gjatë zgjedhjeve të dhjetorit, përfshirë pengesat dhe dyshimet për transportin e votave, çka ka ulur besimin publik në rregullsinë e procesit. Votimi në misionet diplomatike do të organizohet më 6 qershor, një ditë para hapjes së qendrave të votimit brenda Kosovës.

Burim: Lajmi.net
— Redaksia ZHURMA