Pse mbyllet Qendra e Paraburgimit në Gjilan?

— Gjilan, 9 qershor 2026 — Oda e Avokatëve të Kosovës ka declaruar se është njoftuar zyrtarisht nga Shërbimi Korrektues i Kosovës për fillimin e procesit të mbylljes së Qendrës së Paraburgimit në Gjilan dhe transferimin e personave të privuar nga liria drejt institucioneve të tjera korrektuese.

Në njoftimin zyrtar thuhet: “Oda e Avokatëve të Kosovës është njoftuar zyrtarisht nga Shërbimi Korrektues i Kosovës se ka filluar procesi i mbylljes së Qendrës së Paraburgimit në Gjilan, në kuadër të zbatimit të traktatit ndërmjet Republikës së Kosovës dhe Mbretërisë së Danimarkës për shfrytëzimin e këtij objekti për ekzekutimin e dënimeve të shqiptuara nga autoritetet daneze. Sipas njoftimit zyrtar, tashmë ka filluar transferimi gradual i personave të privuar nga liria nga Qendra e Paraburgimit në Gjilan drejt institucioneve të tjera korrektuese, proces i cili do të zhvillohet në faza, në përputhje me vlerësimet e sigurisë, kapacitetet akomoduese dhe nevojat operative të Shërbimit Korrektues të Kosovës”.

Oda e Avokatëve ka theksuar se po e jep njoftimin me qëllim të informimit në kohë të komunitetit të avokatëve dhe të lehtësimit të komunikimit me klientët gjatë kësaj periudhe tranzitore.

Kosova dhe Danimarka në vitin 2022 kanë nënshkruar një marrëveshje 10-vjeçare për transferimin e të burgosurve nga shteti nordik. Sipas marrëveshjes, Danimarka do të marrë me qira 300 qeli burgu në Gjilan, ndërsa Kosova do të përfitojë mbi 200 milionë euro. Kriteret për të burgosurit që do të transferohen nga Danimarka në Kosovë specifikojnë se ata nuk duhet të jenë të dënuar për krime të rënda dhe mbi 10 vjet e të mos kenë probleme mendore.

Plani ka hasur në kundërshtime në Danimarkë, madje për një kohë ishte i pezulluar për shkak të pretendimeve për shkelje të të drejtave të njeriut.

Burim: Lajmi.net, https://lajmi.net/nis-mbyllja-e-qendres-se-paraburgimit-ne-gjilan-objekti-do-te-vihet-ne-sherbim-te-te-burgosurve-nga-danimarka/

— Redaksia ZHURMA