Maqedonia miraton rregullore të re për cilësinë e karburanteve

SHKUP — Qeveria e Maqedonisë miratoi Rregulloren e re për Cilësinë e Karburanteve të Lëngshme, që zëvendëson rregulloren e mëparshme, në fuqi gati 19 vjet. Sipas Ministrisë së Energjisë, Minierave dhe Burimeve Minerale (MEMBM), akti i ri lejon në tregun vendas vetëm karburantet që plotësojnë standardet e përcaktuara dhe është pjesë e zbatimit të Ligjit të ri të Energjisë.

Rregullorja përcakton në detaje cilat lloje karburantesh mund të shiten në tregun vendas, cilat standarde cilësie duhet të përmbushin, si do të kryhet kontrolli i tyre dhe cilat janë detyrimet e pjesëmarrësve në tregun e naftës bruto, derivateve të naftës dhe karburanteve të transportit. Sipas MEMBM-së, një nga risitë kryesore është vendosja e rregullave të barabarta për të gjitha kompanitë, gjë që zvogëlon hapësirën për abuzime dhe konkurrencë të padrejtë.

Kompanitë që veprojnë në përputhje me rregullat do të kenë kushte pune më të drejta dhe më të parashikueshme. Për qytetarët, MEMBM thotë se karburantet që përdorin do të përmbushin standardet e përcaktuara, ndërsa mekanizmat e qarta të kontrollit forcojnë më tej mbrojtjen e konsumatorit.

Ministria shton se standardet më të larta për lëndët djegëse të lëngshme duhet të kontribuojnë edhe në uljen e emetimeve të dëmshme, çka do të ketë ndikim pozitiv në mjedis dhe do të kontribuojë në një sektor energjie më të qëndrueshëm.

Ministrja e Energjisë, Sanja Bozhinovska, vlerësoi se rregullorja e re përfaqëson një reformë të rëndësishme që zëvendëson rregulloret e vjetruara. Me miratimin e saj, Ministria vazhdon zbatimin e Ligjit të ri të Energjisë dhe zëvendësimin gradual të rregulloreve të vjetra, që synojnë siguri më të madhe ligjore dhe një treg më transparent të karburanteve.

Burim: Alsat-M
— Redaksia ZHURMA