Pse Lidhja Shqiptare akuzon për diskriminim gjuhësor në Botëror?

SHKUP — Organizata Lidhja Shqiptare ka shprehur pakënaqësi të madhe për mungesën e komentimit në gjuhën shqipe të ndeshjeve të Kampionatit Botëror në futboll. Sipas reagimit të tyre, ky vendim e përjashton publikun shqiptar në Maqedoninë e Veriut nga qasja e barabartë gjuhësore.

Për më shumë se dy dekada, ky kampionat është transmetuar përmes televizionit publik dhe kanaleve private. Megjithatë, këtë vit të drejtat e transmetimit u siguruan nga Arena Sport, e cila ka ofruar komentim ekskluzivisht në gjuhën maqedonase për shikuesit në vend.

Organizata thekson se ky nuk është thjesht një problem teknik apo komercial, por një diskriminim i qartë kulturor dhe gjuhësor. Sipas tyre, ky rast pasqyron mungesën e standardeve të barazisë në një shtet multietnik ku gjuha shqipe po anashkalohet në hapësirat publike.

Në fund, Lidhja Shqiptare kërkon përgjegjësi nga institucionet përkatëse dhe rishikim të rregullave. Ajo insiston se shteti duhet të garantojë qasje të barabartë për të gjithë qytetarët në përmbajtjet me interes të lartë publik.

Burim: Almakos
— Redaksia ZHURMA