Maqedonci: Vendimmarrja ushtarake duhet të mbetet njerëzore
Ministri i Mbrojtjes i Kosovës mori pjesë në Warsaw Security Forum, ku diskutoi për inteligjencën artificiale dhe sfidat e saj në mbrojtje e demokraci.
Redaksia ZHURMA · · 1 min lexim
Gjatë punimeve të Warsaw Security Forum, në panelin e titulluar «The Battle for Democracy in the AI Age», është diskutuar mbi ndikimin që teknologjitë e reja sjellin në fushën e sigurisë. Pjesë e këtij paneli si folës ka qenë ministri i Mbrojtjes i Kosovës, Ejup Maqedonci, i cili ka adresuar çështjet që lidhen me zhvillimin e shpejtë të sistemeve digjitale dhe ushtarake.
Nëpërmjet një adresimi në rrjetet sociale, kreu i mbrojtjes ka shprehur qëndrimin e tij lidhur me mundësitë dhe rreziqet afatgjata që shoqërojnë këto ndryshime. «Në fjalën time trajtova ndikimin e inteligjencës artificiale në zhvillimin e fushës së mbrojtjes, mundësitë që sjell dhe rreziqet afatgjata që lidhen me zhvillimin e shpejtë të teknologjive ushtarake», ka shkruar ai.
Në fushën e operacioneve luftarake, ministri ka kërkuar ruajtjen e kontrollit dhe rolit përfundimtar nga njeriu. «Theksova se, edhe kur inteligjenca artificiale përdoret në operacionet luftarake, vendimmarrja duhet ta ruajë dimensionin njerëzor dhe përgjegjësinë përfundimtare duhet ta mbajnë njerëzit», ka deklaruar tutje ai. Debati në këtë ngjarje është shtrirë gjithashtu edhe në ndikimet e teknologjisë te shoqëria, vendimmarrja politike dhe sfidat ndaj rendit demokratik.
