Çfarë mangësish gjeti Auditori në menaxhimin e barnave të FSK-së?

PRISHTINË — Zyra Kombëtare e Auditimit ka evidentuar mangësi serioze në menaxhimin e depos së barnave në Ministrinë e Mbrojtjes për vitin 2025. Sipas raportit të fundit zyrtar, mosregjistrimi i rregullt i produkteve medicinale në sistemin elektronik ka shkaktuar pasaktësi të mëdha në evidencën e stokut të Forcës së Sigurisë së Kosovës.

Raporti thekson se menaxhimi i depos nuk është kryer përmes sistemit e-Pasuria. Daljet e barnave drejt kampeve të tjera ushtarake dhe shpërndarja e tyre për pacientët janë dokumentuar vetëm në formë fizike, duke shmangur plotësisht sistemin zyrtar të regjistrimit të mallrave shtetërore.

Kjo praktikë ka bërë që gjendja e stokut të pasqyruar në modulin elektronik të mos përputhet me lëvizjet reale në terren. Auditori vlerëson se mungesa e të dhënave dëmton planifikimin e blerjeve të reja, duke rritur rrezikun për shpenzime të panevojshme ose mungesa.

Përveç kësaj, një problem i madh mbetet grumbullimi i barnave me afat të skaduar, të cilat ende nuk janë asgjësuar. Ndonëse këto produkte janë zhvendosur në një ambient më të përshtatshëm në regjimentin e mjekësisë në FSK, menaxhmenti i ministrisë nuk ka ndërmarrë asnjë masë konkrete për shkatërrimin e tyre ligjor.

Si arsyetim për moslargimin e barnave nga sistemi e-Pasuria, zyrtarët kanë deklaruar se depoja qendrore ku pranohen të gjitha mallrat nuk ka kryer daljet e nevojshme në modulin përkatës të spitalit ushtarak. Aktualisht, ministria është në proces të funksionalizimit të një sistemi të ri të brendshëm të quajtur MIMS.

Në rekomandimet e tij, auditori kërkon nga ministri që të sigurojë një vlerësim real të nevojave përpara se të kryhen blerje të reja. Po ashtu, kërkohet menaxhim i plotë elektronik i hyrje-daljeve, duke respektuar rregulloren për pasurinë jofinanciare, që kërkon dëshmi të saktë për çdo transaksion të kryer në depo.

Megjithatë, Ministria e Mbrojtjes nuk është pajtuar tërësisht me këtë gjetje të auditorit shtetëror. Në reagimin e tyre, udhëheqësit e dikasterit kanë theksuar se programi MIMS është ende në fazën e zbatimit dhe pritet të përmirësojë kontrollin e barnave në të gjitha nivelet organizative.

Burim: Kallxo
— Redaksia ZHURMA