LSDM: Maqedonisë i duhen 52 vjet për mesataren e BE-së

Maja Serafimovska Borozan nga LSDM ka deklaruar se kostoja e jetesës për qytetarët e Maqedonisë së Veriut është rritur për 4.000 denarë nga janari deri më tani. Ajo bëri të ditur se shporta minimale sindikale në tetor ka kaluar 70 mijë denarë, kurse me qira arrin afër 90 mijë denarë, teksa nga viti i ardhshëm paralajmërohen shtrenjtime të reja të energjisë elektrike dhe ngrohjes qendrore.

Serafimovska u shpreh se në Evropë po paralajmërohet një krizë e re për shkak të ngritjes së kostove të energjisë dhe shumë shtete tashmë po ndërmarrin hapa, ndërsa sipas saj Qeveria e Mickoskit nuk ndërmerr asgjë. Ajo theksoi gjithashtu se rreth 180.000 punëtorë marrin paga më të ulëta se 31.200 denarë në muaj, ndërsa paga minimale mbetet e pandryshuar në 26.000 denarë.

«Pagat nuk i ndjekin rritjet e çmimeve. Standardi i jetesës është në nivelin e një të tretës së standardit në Bashkimin Evropian. Jo ekonomia e tretë në Evropë, por vetëm një e treta e standardit evropian. Hulumtimet ekonomike tregojnë se Maqedonisë do t’i duheshin 52 vjet për të arritur mesataren e Bashkimit Evropian për sa i përket mirëqenies», u shpreh ajo.

Siç raportoi Zhurma më 3 tetor 2026, Maqedonia e Veriut mbetet jashtë paketës së re të Bashkimit Evropian, ndërsa institucionet evropiane përgatisin udhërrëfyes të posaçëm për shtetet e avancuara.