LSDM akuzon institucionet për ndotjen e ujërave — Gostivari me epidemi verdhëze
Partia thotë se kimikatet në lumenjtë Lepenc dhe Vardar kanë ndikuar në furnizimin me ujë në Gostivar
SHKUP — LSDM-ja, përmes një komunikate, akuzoi institucionet se ende nuk kanë përcaktuar përgjegjësi për ndotjen e ujërave. Partia shton se në lumenjtë Lepenc dhe Vardar ka përfunduar një kimikat i përdorur në prodhimin e detergjenteve, ndërsa Inspektorati Shtetëror i Mjedisit Jetësor ende nuk i ka publikuar rezultatet përfundimtare të analizave.
“Sa kohë nevojitet për të përcaktuar çfarë e ka ndotur ujin? A po zvarritet qëllimisht procedura?” pyet LSDM-ja, duke theksuar se disa qytete dhe vendbanime përballen me probleme në furnizimin me ujë. Në Gostivar, sipas pretendimeve, ka një epidemi të verdhëzës, çka e rrit shqetësimin e banorëve.
LSDM-ja akuzon kryeministrin Hristijan Mickoski dhe ministrin e Shëndetësisë, Sasho Klekovski, për dhënie të informacioneve të ndryshme lidhur me sigurinë e ujit. Gjithashtu kritikon ministrin e Punëve të Brendshme, Pançe Toshkovski, për mos zgjidhjen e problemeve thelbësore që prekin shëndetin e qytetarëve.
Partia kërkon zbardhje të plotë të rastit, përcaktimin e përgjegjësisë dhe informim transparent të qytetarëve, duke vënë në dukje se opinioni publik nuk merr informacione të plota dhe në kohë për gjendjen e ujërave.
Burim: Almakos
— Redaksia ZHURMA