Liria e Prizrenit kryeson Ligën e Parë drejt rikthimit në Superligë

Liria e Prizrenit po kalon një periudhë fantastike dhe po dominon Ligën e Parë, duke synuar rikthimin në elitën e futbollit kosovar. Skuadra e drejtuar nga trajneri Ismet Munishi ka regjistruar pesë fitore radhazi dhe tashmë numëron nëntë ndeshje pa humbje. Pas 14 xhirove, bardhezinjtë mbajnë kryesimin e tabelës me 32 pikë, të ndjekur nga Prishtina e Re me tri pikë më pak dhe Ferizaj me tetë pikë më pak, ndërsa prizrenasit kanë edhe një ndeshje më pak të zhvilluar. Bilanci i deritanishëm përfshin 10 fitore, dy barazime dhe një humbje të vetme. Për këtë ecuri të shkëlqyer, një meritë të madhe ka trajneri Munishi, i cili synon ta kthejë skuadrën në elitë pas një periudhe prej tri vitesh. Në këtë rrugëtim, futbollistët po mbështeten fuqishëm edhe nga tifozët e zjarrtë, Arpagjikët, të cilët i japin motiv shtesë skuadrës si në ndeshjet vendase ashtu edhe në ato si mysafirë.