Revolta proteston sot para Kuvendit kundër Ligjit për Shtetësinë
Protesta organizohet sot në orën 10:00 në Prishtinë, ku kërkohet edhe shfuqizimi i nenit 155 të Kushtetutës.
PRISHTINË — Lëvizja qytetare “Revolta” do të organizojë sot një protestë para Kuvendit të Kosovës për të kërkuar shfuqizimin e Ligjit për Shtetësinë. Tubimi pritet të nisë nga ora 10:00 në sheshin “Ibrahim Rugova” në Prishtinë.
Organizatorët e protestës kanë paraqitur tri kërkesa kryesore. Ata kërkojnë publikimin e numrit të aplikimeve dhe shtetësive të fituara nga shtetasit e Serbisë sipas ligjit aktual, si dhe shfuqizimin e plotë të Ligjit për Shtetësinë.
Kërkesa e tyre e tretë lidhet me shfuqizimin e nenit 155 të Kushtetutës së Republikës së Kosovës. Kjo lëvizje vlerëson se ky veprim është i nevojshëm për mbrojtjen e sovranitetit dhe integritetit shtetëror të vendit.
“Kjo nuk është çështje partiake, por e sovranitetit dhe të ardhmes së Republikës së Kosovës”, thuhet në thirrjen e lëvizjes për bashkim. Ky aktivitet ka për qëllim sensibilizimin e qytetarëve për mbrojtjen e shtetësisë.
Burim: Ekonomia Online
— Redaksia ZHURMA