Arrestohet Ardian Kamberaj — kërcënoi policin me makinë mishi
I dyshuari kishte qëndruar mbi një muaj në arrati, ndërsa Prokurori i Shtetit ka caktuar masën e ndalimit për 48 orë ndaj tij.
PRIZREN — Policia e Kosovës ka arrestuar Ardian Kamberajn, i cili dyshohet se rreth një muaj më parë kanosi një zyrtar policor në Prizren me fjalët: "S'ma nin mu që je polic. T'i bluaj eshtrat në makinën e mishit". I dyshuari kishte shmangur vazhdimisht ftesat e policisë për t'u paraqitur në stacionin policor.
Hetuesit policorë arritën ta lokalizojnë dhe ta arrestojnë Kamberajn pas veprimeve të shpejta operative dhe hetimore në terren. Sipas burimeve brenda policisë, ky incident kishte ndodhur derisa zyrtari policor ndodhej jashtë detyrës zyrtare. Kamberaj njihet si recidivist i veprave të ndryshme penale.
Me vendim të Prokurorit të Shtetit, ndaj të dyshuarit është caktuar masa e ndalimit për 48 orë, ndërsa hetimet për këtë rast po vazhdojnë. Kamberaj prezumohet i pafajshëm derisa fajësia e tij të mos provohet me vendim të formës së prerë nga gjykata.
Burim: Sinjali
— Redaksia ZHURMA
