Blakaj: Moshetimi i krimeve të luftës e kthen Prokurorinë në rrezik për shtetin

PRISHTINË — Eksperti i sigurisë, Korab Blakaj, ka adresuar kritika të ashpra ndaj Prokurorisë për dështimin në hetimin dhe ndjekjen e krimeve të luftës në Kosovë. Përmes një reagimi, Blakaj paralajmëroi se një prokurori që dështon të ndjekë këto raste shndërrohet në një rrezik për sigurinë dhe dobëson shtetin.

Sipas tij, fuqia e një shteti nuk duhet të matet vetëm përmes ushtrisë apo kontrollit të kufijve, por edhe përmes zbatimit të ligjit dhe ndëshkimit të atyre që cenojnë ekzistencën e tij. Blakaj vlerësoi se krimet e luftës janë tentativa për shkatërrimin e popullit shqiptar dhe zhdukjen e kujtesës historike.

Ai vuri në dukje se megjithëse institucionet e inteligjencës mbledhin informacione të mjaftueshme, ato mbeten të pashfrytëzuara pa veprimin e organit të akuzës. Eksperti ngriti pyetjen se çfarë vlere kanë raportet shtetërore që mbyllen në sirtarë nëse autorët e dyshuar nuk përballen asnjëherë me aktakuza konkrete.

Më tej, ai theksoi se çdo vonesë në këtë proces vështirëson sigurimin e provave dhe sjell humbjen e dëshmitarëve kyç. Kjo amulli, sipas tij, ka zbehur ndjeshëm besimin e qytetarëve te ligji dhe ka krijuar përshtypjen se institucionet nuk janë të afta të mbrojnë interesin strategjik dhe viktimat.

Blakaj nuk kurseu as mediat, duke i akuzuar se kanë zhvendosur vëmendjen në tema dytësore në vend që të kërkonin llogari për këto rezultate. Ai paralajmëroi se pandëshkueshmëria e zgjatur mund të dëmtojë rëndë shpresën e qytetarëve se sistemi i drejtësisë mund të reformohet përmes rrugëve demokratike.

Burim: Gazeta Dukagjini
— Redaksia ZHURMA