Lamallari inspekton Shëngjinin, 357 shoferë të gjobitur për shpejtësi
Disa nga shpejtësitë e regjistruara arritën deri mbi 200 km/orë, tha Hita gjatë inspektimit të fundjavës.
SHËNGJIN — Ministri i Punëve të Brendshme, Besfort Lamallari, i shoqëruar nga Drejtori i Përgjithshëm i Policisë së Shtetit, Skënder Hita, inspektoi të martën zbatimin e masave të sigurisë në Shëngjin, në kuadër të sezonit turistik. Vetëm gjatë fundjavës, 357 shoferë u ndëshkuan për tejkalim të shpejtësisë, me shpejtësi të konstatuara nga 150 deri mbi 200 km/orë.
Hita theksoi se siguria rrugore mbetet një nga prioritetet kryesore të Policisë së Shtetit gjatë sezonit turistik, ndaj janë intensifikuar kontrollet dhe është shtuar përdorimi i mjeteve inteligjente në të gjitha akset rrugore. Ai bëri apel te përdoruesit e rrugës që të respektojnë kufijtë e shpejtësisë dhe sinjalistikën, pasi shpejtësia mbetet një nga shkaqet kryesore të aksidenteve fatale.
Drejtori i Përgjithshëm u ndal edhe te problematika e ndotjes akustike, duke vlerësuar punën e Drejtorisë Vendore të Policisë Lezhë për kontrollet e vazhdueshme dhe matjet e nivelit të zhurmës me pajisje të specializuara.
Hita kërkoi nga strukturat e Policisë Lezhë, si dhe nga të gjitha strukturat policore në vend, që të intensifikojnë kontrollet, në zbatim të ligjit, me qëllim garantimin e qetësisë publike dhe krijimin e kushteve sa më të mira për banorët dhe pushuesit në zonat turistike.
Burim: Euronews Albania
— Redaksia ZHURMA