Lamallari: Gazi i policisë është i certifikuar dhe përdoret në BE e SHBA
Ministri i Brendshëm akuzoi opozitën se po përdor mercenarë të paguar dhe u kërkoi të largojnë personat me kapuçë para se t'i largojë policia.
TIRANË — Lëndët irrituese të përdorura nga Policia e Shtetit për të neutralizuar dhunën e protestuesve janë të gjitha të certifikuara, deklaroi ministri i Brendshëm Besfort Lamallari gjatë seancës në Kuvend. Ai konfirmoi se produktet e përdorura janë speciale për vetëmbrojtje dhe përdoren gjerësisht nga policitë e vendeve të Bashkimit Europian dhe Shteteve të Bashkuara të Amerikës.
Sipas ministrit, lëndët speciale irrituese "RSG8 TW1000 Professional" dhe "VESK RSG 8000 Special" u përdorën konform ligjit për të garantuar mbarëvajtjen e protestës. Lamallari theksoi se policia po kryen detyrën për sigurinë dhe se opozita nuk ka asnjë të drejtë morale t'i japë leksione mbi garantimin e rendit.
Ministri Lamallari akuzoi gjithashtu opozitën se po toleron individë që nxisin dhunë, duke pretenduar se tubimi po organizohet me mercenarë të paguar. Ai u bëri thirrje organizatorëve që të largojnë njerëzit me kapuçë përpara se të ndërhyjë policia, duke e quajtur partinë e tyre një parti "skuthash".
Burim: Shqiptarja
— Redaksia ZHURMA