Kuvendi voton sot Ligjin për Specialen pas ndërprerjes nga Haxhiu

Seanca plenare e Kuvendit të Kosovës vazhdon sot nga ora 11:00, ku në rend dite është votimi i Ligjit për Dhomat e Specializuara dhe Zyrës së Prokurorit të Specializuar. Puna u ndërpre pasi deputetët nuk u kthyen në sallë gjysmë ore pas kohës së planifikuar në orën 14:00, çka bëri që kryetarja e Kuvendit, Albulena Haxhiu, ta shtyjë seancën. Haxhiu i kritikoi deputetët duke deklaruar: «Nuk është serioze, gjysmë ore pas orës 14:00 nuk po vijnë deputetët. Nuk kam mundësi me funksionu dhe me prit deri në pafundësi».

Kjo pikë u shtua pas kërkesës së PDK-së, ndërkohë që nisma ka ndeshur në kritika të ashpra nga ndërkombëtarët. Britania e Madhe paralajmëroi se ndryshimet e propozuara mund të dëmtojnë marrëdhëniet me partnerët ndërkombëtarë dhe nuk u shërbejnë interesave të Kosovës. Ambasada Gjermane u pajtua plotësisht me qëndrimin e Zyrës së Bashkimit Evropian, e cila theksoi se amendamentet ngrenë shqetësime serioze për obligimet ndërkombëtare, sundimin e ligjit, pavarësinë e gjyqësorit, mbrojtjen e dëshmitarëve dhe kushtetutshmërinë, duke kërkuar konsultime paraprake.