Kushtet e motit krijojnë vështirësi në qarkullimin rrugor të juglindjes
Mjegulla e dendur përfshin disa akse nacionale në juglindje të vendit, ndërsa autoritetet shtojnë patrullat dhe apelojnë për kujdes.
Redaksia ZHURMA · · Përditësuar · 1 min lexim
Një pjesë e madhe e juglindjes së vendit është përfshirë nga mjegulla e dendur, duke vështirësuar qarkullimin e automjeteve në disa akse nacionale. Për shkak të uljes së dukshmërisë, situata më problematike paraqitet në segmentin nga fshati Libonik deri në Grabovicë të aksit Korçë-Pogradec, në rrugën Voskop-Voskopojë, në segmentin Boboshticë-Dardhë, në pjesë të ndryshme të aksit Qafë Plloçë-Qukës, si dhe në majën e Qafë Thanës.
Përballë këtyre kushteve atmosferike, Policia Rrugore u bën apel drejtuesve të mjeteve të tregojnë kujdes të shtuar, të respektojnë rregullat e qarkullimit dhe të reduktojnë shpejtësinë. Nga ana tjetër, Sektori i Qarkullimit Rrugor ka shtuar patrullat në akset problematike me qëllim monitorimin e situatës dhe garantimin e sigurisë për përdoruesit e rrugës, ndërsa deri tani nuk raportohen aksidente rrugore.