Kushner: Putini pranoi përfshirjen e evropianëve në bisedimet e paqes

Të dërguarit e presidentit amerikan Donald Trump, Jared Kushner dhe Steve Witkoff, njoftuan më 12 nëntor se presidenti rus Vladimir Putin ka pranuar që përfaqësuesit evropianë të marrin pjesë në rundin e ardhshëm të bisedimeve të paqes për Ukrainën, pas negociatave treditore mes Moskës, Kievit dhe Uashingtonit.

Përpjekjet diplomatike treditore përfshinë takime të dërguarit Kushner me Putinin në Moskë, me presidentin ukrainas Volodymyr Zelensky në Dublin, si dhe diskutime me këshilltarë evropianë për sigurinë kombëtare. Pavarësisht marrëveshjes për përfshirjen e Evropës, bisedimet sollën përparim të kufizuar për përfundimin e luftës së Rusisë kundër Ukrainës, pasi Moska vazhdon të mbajë të paprekura kërkesat e saj kryesore ushtarake dhe politike.

Sipas të dërguarve amerikanë, Kushner tha se të dyja palët tashmë kanë rënë dakord për praninë e evropianëve dhe vlerësoi se diplomacia e ditëve të fundit solli përparim domethënës. I dërguari i posaçëm amerikan sqaroi se në bisedimet e ardhshme do të trajtohen si çështjet territoriale mes Ukrainës e Rusisë, ashtu edhe marrëveshjet më të gjera për sigurinë në Evropë. Kushner theksoi se Uashingtoni po punon edhe për atë që mund të bëhet shkëmbimi më i madh i të burgosurve që nga fillimi i luftës, për të mundësuar ribashkimin e mijëra njerëzve me familjet e tyre. Ish-zyrtari i Departamentit të Shtetit, Thomas Melia, deklaroi se pjesëmarrja e vendeve evropiane do ta forcojë pozitën e Kievit në tryezë. Nga ana tjetër, shefja e politikës së jashtme të BE-së, Kaja Kallas, vërejti se Evropa e ka një arkitekturë sigurie dhe kujtoi marrëveshjet që Rusia i ka shkelur vazhdimisht, ndërsa presidenti francez Emmanuel Macron theksoi se evropianët do të vendosin vetë për sigurinë e tyre.

Putini ka sugjeruar se negociatat katërpalëshe mund të nisin pasi vendet evropiane të caktojnë një përfaqësues të autorizuar të flasë në emër të tyre. Ndërkohë, Rusia po vazhdon sulmet ndaj Ukrainës dhe kërkon kontrollin e plotë të katër rajoneve ukrainase që pretendon se i ka aneksuar, duke kundërshtuar njëkohësisht vendosjen e forcave të huaja paqeruajtëse.

«Ne nuk mund ta përmbyllim këtë marrëveshje pa praninë e evropianëve në tryezën e negociatave. Këtë ia kemi bërë të qartë Vlladimir Putinit, se besojmë që kjo është shumë e rëndësishme. Presidenti ukrainas Volodimir Zelenski ka qenë një mbështetës shumë i fortë i këtij qëndrimi dhe e ka theksuar këtë që nga fillimi. Mendoj se kemi arritur ta sigurojmë këtë me Putinin dhe ai është i gatshëm të provojë. Shpresojmë se në bisedimet e drejtpërdrejtë, kur njerëzit ulen së bashku, mund të diskutojnë çështjet me më shumë qetësi dhe t’i shqyrtojnë ato një nga një. Ajo që mund të them, të paktën nga ajo që po dëgjojmë, është se njerëzit duan ta shohin këtë luftë të përfundojë», deklaroi Kushner.