Kushner dhe Witkoff mbërrijnë në Moskë për t'u takuar me Putinin

Negociatorët amerikanë Jared Kushner dhe Steve Witkoff kanë mbërritur në aeroportin Vnukovo të Moskës ku u pritën nga i dërguari rus Kirill Dmitriev përpara takimit të tyre me presidentin Vladimir Putin, teksa Rusia dhe Ukraina shkëmbyen sulme ndaj kryeqyteteve të njëra-tjetrës në orët e para të së enjtes.

Bisedimet dyditore të paqes mes delegacioneve nga Rusia dhe Ukraina kishin përfunduar të mërkurën në Abu Dhabi. Gjatë atyre takimeve, palët u doli të arrinin një marrëveshje për shkëmbimin e të burgosurve. Ndërmjetësuesit nga Shtetet e Bashkuara të Amerikës bënë me dije se midis dy vendeve vazhdojnë të ekzistojnë mospajtime të mëdha për çështje kryesore, përfshirë ato që kanë të bëjnë me territorin.

Sulmet e reja ushtarake dëmtuan rrjetin energjetik dhe objekte të tjera. Ministria ruse e Mbrojtjes njoftoi në rrjetin Telegram se ka goditur objektiva ushtarake dhe energjetike në Ukrainë, si dhe një depo municionesh në Kiev, ku u dëgjuan edhe shpërthime sipas agjencisë Reuters. Guvernatori i rajonit Khmelnytskyi, Serhii Tiurin, deklaroi në Telegram se si pasojë e sulmit rus ndaj infrastrukturës energjetike në distriktin e Shepetivkës janë shkaktuar ndërprerje emergjente të energjisë elektrike, ndërsa një zjarr shpërtheu në rajonin perëndimor. Rusia goditi gjithashtu gjashtë nënstacione elektrike në rajonet Vinnytsia, Kirovohrad, Zhytomyr dhe Cherkasy, duke dëmtuar linjat dhe furnizimin në vend. Një zyrtar lokal njoftoi se sulmet dëmtuan infrastrukturën energjetike e civile edhe në rajonin e Rivnes. Kryetari i bashkisë së Moskës, Sergei Sobyanin, tha në Telegram se mbrojtja ajrore ruse rrëzoi pesë dronë ukrainas që po drejtoheshin drejt kryeqytetit rus, kurse zyrtarët lokalë njoftuan se dronë të tjerë u rrëzuan në rajone si Rostovi dhe Tula. Po ashtu, një kolonel i Forcave të Armatosura ruse mbeti i vrarë në Shushary, në periferi të Shën Petërburgut, nga shpërthimi i automjetit të tij i aktivizuar në distancë, ndërsa një familjar i pranishëm mbijetoi. Në anën tjetër, Italia firmosi dekretin ndërministror përmes ministrit të Ekonomisë dhe Financave Giancarlo Giorgetti për të dërguar paketën e 13-të të ndihmave për Ukrainën.

Pas përfundimit të vizitës në Moskë, negociatorët amerikanë planifikojnë të udhëtojnë drejt Irlandës. Në këtë shtet evropian ata do të takojnë presidentin ukrainas Volodymyr Zelensky, i cili pritet të jetë pranishëm në një takim me liderët evropianë.

I dërguari i presidentit rus, Kirill Dmitriev, shkroi në rrjetin social X tekstin «Mirëpres Steve dhe Jared në Moskë», ku postoi një fotografi me Steve Witkoff dhe Jared Kushner pranë një avioni. Kushner ka deklaruar se partnerët evropianë duhet të jenë pjesë e tryezës së negociatave mes Rusisë dhe Ukrainës.