Kush mban përgjegjësinë për rezultatet zero kundër korrupsionit?

PRISHTINË — Në Kosovë nuk ka progres në luftën kundër korrupsionit, vlerëson ish-drejtori i Agjencisë Kundër Korrupsionit (AKK), Hasan Preteni. Në një intervistë për Ekonomia Online, ai tha se përgjegjësia kryesore për këtë situatë bie mbi prokurorinë, ndërsa theksoi se mungon edhe vullneti politik për ndryshimet ligjore të nevojshme.

Preteni veçoi mungesën e çdo rasti të fuqishëm kundër korrupsionit: asnjë zyrtar i lartë nuk është burgosur, dhe nuk ka pasur asnjë konfiskim të pasurisë së krijuar në mënyrë të paligjshme. Sipas tij, diferencën mes shtetit demokratik dhe anarkisë e bën pikërisht prokuroria, e cila në Kosovë funksionon vetëm formalisht.

Preteni tha: “Jo, nuk ka lëvizje progresive.” Sipas tij, qytetarët e Kosovës vazhdojnë të mbesin në bindjen se korrupsioni nuk luftohet në vend, ndërsa perceptimi publik mbetet i vetmi tregues i disponueshëm për nivelin e korrupsionit. Problemi kryesor, thotë ai, nuk është korrupsioni klasik, por krimi i organizuar, veçanërisht në prokurimin publik.

Në prokurimin publik, tha Preteni, “shumë zyrtarë brenda një institucioni merren vesh, të kushtëzuar për të shkelur ligjin.” Kjo mbetet fusha më e rrezikuar, shpjegoi ai, sepse ofron mundësi për të fituar shumë para me rrezik të vogël, brenda një kohe të shkurtër.

Preteni shtrin përgjegjësinë edhe përtej prokurorisë: edhe institucionet, edhe klasa politike, thotë ai, kanë bllokuar nismat ligjore kundër korrupsionit gjatë tre-katër viteve të fundit. Sipas tij, të gjitha nismat për ndryshim të legjislacionit dërgohen në Gjykatën Kushtetuese, ku prolongohen dhe rezultate nuk ka.

Si model për reformimin e sistemit të drejtësisë, Preteni përmendi Shqipërinë dhe Kroacinë. “S’ka vullnet politik për të ndryshuar legjislacionin,” tha ai. Kosova, sipas tij, ka nevojë për një “spastrim themel” të Gjykatës Kushtetuese dhe të gjitha gjykatave e prokurorive, siç po ndodh në Tiranë.

Lidhur me rolin e agjencive kundër korrupsionit, Preteni thotë se hetimi dhe ndëshkimi i korrupsionit duhet të mbeten detyrë ekskluzive e policisë dhe prokurorisë. Sipas tij, ligjvënësi ka bërë mirë duke i lënë agjencive specifike vetëm angazhimet te etika, integriteti dhe parandalimi i korrupsionit.

Burim: Ekonomia Online
— Redaksia ZHURMA