Kush do të sfidojë Dukagjinin e Klinës për trofeun final?
Sot dhe nesër në Frankfurt zhvillohet turneu i Kupës së Federatës Shqiptare të Futbollit në Gjermani, ku fituesi nis rrugëtimin drejt duelit me kampionët e Zvicrës dhe Kosovës.
FRANKFURT — Në Frankfurt po zhvillohet turneu i Kupës së Federatës Shqiptare të Futbollit në Gjermani, ku skuadrat e komunitetit garojnë për trofeun e këtij edicioni. Rëndësia e kësaj gare kalon kufijtë gjermanë, pasi fituesi i Kupës do të përballet me fituesin e Kupës së Shqiptarëve në Zvicër.
Sfidat nuk përfundojnë këtu, pasi skuadra që do të triumfojë në duelin gjermano-zvicerruas, do të sfidojë në një finale të madhe fituesin e Kupës së Kosovës, Dukagjinin e Klinës. Ky format synon të krijojë një urë sportive që bashkon komunitetin shqiptar në tri vende të ndryshme.
Kryetari i Federatës në Gjermani, Afrim Osmani, theksoi se tradita sportive vazhdon pavarësisht temperaturave të larta në Frankfurt. Ai falenderoi për mbështetjen përfaqësuesit e Ministrisë së Punëve të Jashtme të Kosovës dhe konsullatat e Kosovës në Frankfurt dhe Mynih, duke vlerësuar angazhimin e ekipeve pjesëmarrëse.
Anëtari i Komitetit Ekzekutiv i FFK-së, Enver Muzliukaj, vlerësoi kushtet teknike dhe ambientin e turneut si shumë të mira për një organizim dinjitoz. Gjatë eventit, Afrim Osmani nderoi Ruzhdi Statovcin me titullin „Kryetar Nderi“, në mirënjohje për kontributin e tij gjatë 24 viteve në krye të federatës.
Burim: Gazeta Express
— Redaksia ZHURMA