Kujt i besojnë kosovarët — dhe ku renditet Turqia?

PRISHTINË — Shtetet e Bashkuara dhe NATO renditen si institucionet ndërkombëtare më të besuara ndërmjet kosovarëve, me nga 88 për qind besim — rezultat i sondazhit vjetor 2026 të programit WeBalkans, i cili mat perceptimet e qytetarëve ndaj Bashkimit Evropian dhe partnerëve ndërkombëtarë.

Bashkimi Evropian renditet i tretë me 83 për qind besim, i ndjekur nga Banka Botërore me 82 për qind dhe Fondi Monetar Ndërkombëtar (FMN) me 80 për qind. Befasia e listës është Turqia, e cila gëzon besimin e 78 për qind të kosovarëve — e gjashtë ndërmjet partnerëve kryesorë ndërkombëtarë.

Sa i përket integrimit evropian, mbështetja mbetet e lartë: 83 për qind e qytetarëve e përkrahin anëtarësimin, ndërsa 85 për qind besojnë se ai do të sillte më shumë përparësi sesa mangësi. Gati gjysma — 48 për qind — shpresojnë ta shohin Kosovën si anëtare të BE-së brenda pesë viteve të ardhshme.

Edhe 32 për qind mendojnë se anëtarësimi do të ndodhë brenda pesë deri 15 vjetëve, ndërsa vetëm 3 për qind besojnë se Kosova nuk do të bëhet kurrë pjesë e BE-së. Gjithashtu, 68 për qind deklarojnë se ndihen të mirëinformuar ose disi të informuar për procesin e integrimit.

Përfitimi kryesor që qytetarët e lidhin me anëtarësimin është përmirësimi i imazhit të Kosovës ndërkombëtarisht, i përmendur nga 49 për qind e të anketuarve. Pasojnë paqja dhe siguria për Kosovën e rajonin me 43 për qind, si dhe e ardhmja më e mirë për fëmijët me 42 për qind.

Pengesë kryesore për integrimin shihet korrupsioni, i identifikuar nga 40 për qind e qytetarëve si sfida më e madhe. Mungesa e interesit të BE-së vjen e dyta me 27 për qind, ndërsa 26 për qind e identifikojnë mungesën e vullnetit politik brenda Kosovës — shkak i tretë sipas vetë kosovarëve.

Ndërgjegjësimi për mbështetjen financiare të BE-së është thuajse universal: 97 për qind e qytetarëve e dinë se Bashkimi Evropian financon projekte në Kosovë, ndërsa 65 për qind e vlerësojnë atë mbështetje efektive. Fushat ku qytetarët dëshirojnë rol më të madh të BE-së janë zhvillimi ekonomik, shëndetësia dhe lufta kundër korrupsionit.

Burim: Zëri
— Redaksia ZHURMA