Ministria kufizon mjetet mbi 20 tonë në autoudhë për shkak të vapës
Kufizimi vlen nga ora 11:00 deri në 17:30, kur temperaturat pritet të kalojnë 32 gradë Celsius.
PRISHTINË — Ministria e Infrastrukturës dhe Transportit njoftoi se sot, më 30 korrik, hyjnë në fuqi kufizime të qarkullimit për automjetet e transportit të mallrave me masë totale mbi 20 tonë në autoudhët e Kosovës. Kufizimi zbatohet nga ora 11:00 deri në 17:30, shkak i temperaturave që parashikohet të arrijnë ose të kalojnë 32 gradë Celsius.
Në rrugët nacionale, rajonale dhe lidhëse qarkullimi vazhdon normalisht, pa kufizime. Nga vendimi përjashtohen automjetet e organeve të rendit dhe sigurisë publike, shërbimet emergjente dhe institucionet shëndetësore.
Ministria u ka bërë thirrje operatorëve ekonomikë dhe drejtuesve të mjeteve që të respektojnë kufizimet e vendosura dhe të planifikojnë qarkullimin në përputhje me orarin e përcaktuar.
Burim: Gazeta Dukagjini
— Redaksia ZHURMA