Kryeziu-Hyseni: Kërkuam mbështetjen e Gjermanisë për integrimin evropian

Kryetarja e Komisionit për Punë të Jashtme dhe Diasporë, Arbreshë Kryeziu-Hyseni, ka deklaruar se në takimin e parë të komisionit me ambasadorin e ri të Gjermanisë në Kosovë, Rainer Rudolph, është diskutuar për marrëdhëniet bilaterale dhe kërkesat e Kosovës në proceset e rëndësishme ndërkombëtare.

Takimi kishte karakter njoftues pasi ambasadori Rudolph ka marrë së fundmi detyrën e tij në Kosovë, ndërsa deputetët kanë shfrytëzuar rastin për të prezantuar qëndrimet e tyre rreth procesit të integrimit evropian dhe anëtarësimit në organizata të ndryshme ndërkombëtare.

Sipas Kryeziu-Hysenit, deputetët kanë kërkuar që Kosova të vazhdojë të mbetet në agjendat e Gjermanisë për mbështetje në rrugën drejt integrimit evropian dhe anëtarësimit në mekanizma ndërkombëtarë, duke përfshirë Këshillin e Evropës dhe NATO-n, sidomos në kohën e përballjes me një situatë fragjile në Evropë. Ajo ka bërë të ditur se nga ambasadori gjerman kanë marrë mbështetje për të shtyrë përpara këto kërkesa të Kosovës, ndërsa është diskutuar edhe mundësia e ftesës për vizitë në Kosovë për homologët e tyre nga Bundestagu gjerman.

Gjatë takimit janë trajtuar edhe çështje të ndjeshme, ku Kryeziu-Hyseni ka theksuar se një nga kërkesat e përbashkëta të deputetëve ishte që Serbia, pas daljes nga një proces i ri zgjedhor dhe me një përbërje të re politike, të detyrohet t'i sjellë para drejtësisë përgjegjësit për sulmin terrorist në Banjskë, duke kërkuar që kjo të jetë edhe pjesë e qendrimit të ndërkombëtarëve që tashmë i posedojnë raportet përkatëse.

«Ky ishte një takim i cili i paraprin takimeve të radhës në Komisionin për Politikë të Jashtme dhe Diasporë me ambasadorë të shteteve mike, aleatë të Kosovës», ka deklaruar Kryeziu-Hyseni, duke shtuar se bisedat përfshijnë kërkesa specifike të deputetëve në kuadër të proceseve aktuale në vend.

Ajo ka shtuar gjithashtu lidhur me temat e ndjeshme se «njëra prej kërkesave të përbashkëta, mund ta them, e të gjithë deputetëve ishte që të kërkohet nga Serbia, e cila tashmë sapo ka dalë prej një procesi të ri zgjedhor dhe do të ketë një përbërje të re politike atje, që kryesuesit e sulmit terrorist në Banjskë të sillen para drejtësisë».