KPK: Konkurs për katër prokurorë në Speciale ndonëse u kërkuan shtatë

Këshilli Prokurorial i Kosovës ka vendosur të shpallë konkurs për avancimin e katër prokurorëve në Prokurorinë Speciale të Republikës së Kosovës, ndonëse ushtruesi i detyrës së kryeprokurorit të këtij institucioni kishte kërkuar shtatë pozita. Konkursi zyrtar do të hapet më 17 nëntor dhe do të qëndrojë i hapur për 15 ditë pas vendimit të marrë në mbledhjen e Këshillit Prokurorial të Kosovës.

Vendimi për hapjen e konkursit erdhi pas shqyrtimit të kërkesës së ushtruesit të detyrës së kryeprokurorit të Prokurorisë Speciale të Republikës së Kosovës, Dren Paca, i cili kishte kërkuar shtatë prokurorë shtesë për të përballuar ngarkesën e punës. Gjatë shqyrtimit të kësaj kërkese në mbledhje, u tha se duhet të merret parasysh edhe fakti se mungesë e theksuar e prokurorëve ka edhe në prokuroritë e tjera të vendit.

Kryesuesi i Këshillit Prokurorial të Kosovës, Arian Gashi, shpjegoi se ndryshimet ligjore kanë zgjeruar kompetencat e Prokurorisë Speciale, duke ndikuar drejtpërdrejt në rritjen e numrit të lëndëve të pranuara dhe të trajtuara. Sipas tij, kjo rritje është reflektuar edhe në raportet statistikore, ndërkohë që kapacitetet njerëzore kanë mbetur të pamjaftueshme për përballimin e ngarkesës aktuale. «Me ndryshimet e ligjit për Prokurorinë Speciale është zgjeruar kompetenca e kësaj prokurorie, gjë e cila ka ndikuar drejtpërdrejt në rritjen e numrit të lëndëve të pranuara dhe të trajtuara dhe se kjo rritje është reflektuar edhe në raporte statistikore, ndërkohë që kapacitetet njerëzore kanë mbetur të pamjaftueshme për përballimin e ngarkesës aktuale», tha Gashi.

Kryesuesi i Këshillit Prokurorial të Kosovës shtoi se mungesa e prokurorëve nuk është problem vetëm i Prokurorisë Speciale, por i gjithë sistemit prokurorial, veçanërisht i prokurorive themelore në departamentin e përgjithshëm. Ai theksoi se aktualisht është duke u zhvilluar procesi i rekrutimit për 27 pozita të prokurorëve, ku tashmë është kaluar faza e parë, por vlerësoi se nevojiten edhe kapacitete të tjera shtesë. «Gjendjen që e kemi në të gjitha prokuroritë nuk e kemi mirë, duke marrë parasysh faktin sidomos në prokuroritë themelore në departamentin e përgjithshëm askund nuk e kemi gjendjen mirë, diku e kemi keq e diku keq e më keq, për shkak mungesës të madhe të prokurorëve në sistem, ne jemi në proces të rekrutimit të 27 pozitave që i kemi të prokurorëve, kemi kaluar fazën e parë», u shpreh ai.

Në diskutimin e bërë gjatë mbledhjes, propozimi për miratimin e pjesshëm të kërkesës në katër pozita mori pesë vota për, asnjë kundër dhe dy abstenime. Edhe Kryeprokurori i Shtetit, Zejnulla Gashi, u pajtua me nevojën për shtimin e kapaciteteve në Prokurorinë Speciale, por theksoi rëndësinë e kujdesit gjatë procesit të avancimit, duke marrë parasysh gjendjen në prokuroritë e tjera dhe procesin e pranimit të prokurorëve të rinj. Ai shtoi se dinamika e punës ka ndryshuar dhe se trajtimi i rasteve që kërkojnë bashkëpunim vendor dhe ndërkombëtar e bën të domosdoshëm shtimin e numrit të prokurorëve. Me këtë vendim të Këshillit Prokurorial të Kosovës, Prokurorisë Speciale i hapet rruga për shtimin e katër prokurorëve përmes procesit të avancimit.