Kosovë-Izrael: Dy raste shënimi dhe fokus mbrojtës në “Fadil Vokrri”

Ka nisur ndeshja ndërmjet Kosovës dhe Izraelit, e vlefshme për Ligën e Kombeve të UEFA-s, e cila po zhvillohet në stadiumin “Fadil Vokrri” në Prishtinë. Në dhjetë minutat e para të takimit, Kosova i është afruar dy herë shënimit të golit me Kreshnik Hajrizin dhe Edon Zhegrovën, por tentimet e tyre kanë përfunduar jashtë portës. Ndërkohë, ekipi izraelit është përqendruar kryesisht në fazën defensive.

Përballja vjen pas thirrjes motivuese të Federatës së Futbollit të Kosovës drejtuar tifozëve për mbështetjen e Kombëtares. «DITA E KOSOVËS! Një komb. Një zemër. Një qëllim. Fitorja! Për Kosovën, deri në fund! Forca Dardanë!», thuhet në mesazhin e FFK-së, ndërsa “Dardanët” synojnë një rezultat pozitiv para publikut të tyre.