Kosovarët kryesojnë lejet e qëndrimit në Shqipëri — 7,302 leje aktive
Mbi 7 mijë shtetas nga Kosova janë të pajisur me leje qëndrimi aktive, duke përbërë 19 për qind të të gjithë shtetasve të huaj.
TIRANË — Shtetasit nga Kosova kryesojnë listën e të huajve me leje qëndrimi në Shqipëri, duke arritur në 7,302 leje aktive deri në qershor të vitit 2026. Sipas të dhënave zyrtare të Policisë së Shtetit, ky numër përbën rreth 19 për qind të totalit prej 38,712 lejeve të miratuara në tërë vendin.
Pas shtetasve kosovarë, numrin më të madh të lejeve të qëndrimit në Shqipëri e mbajnë italianët me 4,332 leje apo 11 për qind të totalit. Në vendin e tretë renditen shtetasit nga India me 3,882 leje, të pasuar nga filipinasit me 3,638 dhe egjiptianët me 3,441 leje aktive.
Arsyeja kryesore e qëndrimit të të huajve në Shqipëri mbetet punësimi, ku lejet unike për punëmarrës dhe vetëpunësim arritën në 22,693, duke përbërë 59 për qind të të gjitha lejeve. Këtë kategori e kryesojnë shtetasit nga Filipinet, India dhe Egjipti, me gjithsej 10,258 leje unike së bashku.
Për sa u përket lejeve për bashkim familjar, ato numërojnë 7,124 raste në total dhe dominohen sërish nga shtetasit e Kosovës me 2,978 leje apo 42 për qind të këtij motivi. Për lejet e studimit kryesojnë italianët me 462 leje, ndërsa iranianët udhëheqin në kategorinë e lejeve humanitare me 2,440 sosh.
Në kategoritë specifike, italianët kanë 783 leje për bashkim familjar e turqit 518, ndërsa indianët janë të pajisur me 426 leje studimi. Këto shifra pasqyrojnë ndryshimet demografike dhe tregun e punës në Shqipëri, ku krahu i huaj i punës dhe lidhjet ndërshqiptare dominojnë regjistrimet.
Burim: Gazeta Express
— Redaksia ZHURMA
