Kosova për herë të parë me dy filma në garën për Oscar
Komiteti zgjodhi 'Dua' të Blerta Bashollit si propozim zyrtar, ndërsa 'Shame and Money' i Visar Morinës, fitues në Sundance, është kualifikuar drejtpërdrejt.
PRISHTINË — Komiteti Përzgjedhës i angazhuar nga Qendra Kinematografike e Kosovës ka zgjedhur filmin "Dua", me regji të Blerta Bashollit, si propozimin zyrtar të vendit për kategorinë "International Feature Film" në edicionin e 99-të të "Academy Awards". Ky është viti i parë kur Kosova do të ketë dy filma në garën për Oscar.
Vendimin e mori komiteti i përbërë nga Kaltrina Krasniqi (kryesuese), Antoneta Kastrati, Ilir Hasanaj, Tristan Halilaj dhe Vullnet Sanaja. Sipas vlerësimit të tyre, personazhi i Duas, i interpretuar nga Pinea Matoshi, sjell një performancë autentike dhe emocionalisht të fuqishme, ndërsa Basholli ndërton një rrëfim që trajton një periudhë të rëndësishme të historisë së Kosovës.
Përveç "Dua" — për të cilën Kosova kishte njoftuar përfaqësimin — në garën për Oscar është kualifikuar drejtpërdrejt edhe filmi "Shame and Money", me regji të Visar Morinës, fitues i çmimit "Grand Jury Prize" në Sundance Film Festival.
Burim: Sinjali
— Redaksia ZHURMA
