Sa thellë po varësohet Kosova nga importet italiane?

PRISHTINË — Deficiti tregtar i Kosovës me Italinë arriti rekordin e 340.5 milionë eurove gjatë vitit 2025, sipas të dhënave të Agjencisë së Statistikave të Kosovës të analizuara nga Oda Ekonomike e Kosovës.

Importet nga Italia u rritën në 369.4 milionë euro, ndërsa eksportet ranë në vetëm 28.9 milionë. Diferenca është rritur me 16% krahasuar me 2024-n, kur deficiti ishte 293.5 milionë euro. Eksportet drejt Italisë kanë pësuar rënie prej 22.7% në një vit. Nga 37.4 milionë euro në 2024, ato zbritën në 28.9 milionë. Në të kundërt, importet u shtuan me 11.6%, nga 330.9 në 369.4 milionë euro.

Mbulueshmëria e importeve me eksporte ra në 7.8%, niveli më i ulët në katër vjet. Ky tregues ishte 16.8% në 2022, 13.4% në 2023 dhe 11.3% në 2024 — një përkeqësim i vazhdueshëm i pozitës eksportuese të Kosovës. Trendi rënës i eksporteve ka një mesatare vjetore prej 16.2% që nga 2022-ja, ndërsa importet janë rritur mesatarisht me 7.8% në vit.

Seritë historike tregojnë thellimin e kësaj pabarazie. Importet nga Italia kanë ndjekur trend të vazhdueshëm rritës: 185.8 milionë euro në 2020, 275.1 milionë në 2021, 275.9 milionë në 2022, 287.5 milionë në 2023, 330.9 milionë në 2024 dhe 369.4 milionë në 2025. Eksportet, pas kulmit të 59.7 milionë euro në 2021, kanë rënë vazhdimisht: 46.4 milionë në 2022, 38.7 milionë në 2023, 37.4 milionë në 2024 dhe 28.9 milionë në 2025.

Italia është partneri i pestë më i madh importues i Kosovës, me 5.2% të importeve totale, por vetëm destinacioni i dhjetë i eksporteve kosovare, duke përfshirë vetëm 3.1% të eksportit të përgjithshëm. Struktura e importeve dominohet nga makineritë dhe pajisjet mekanike-elektrike (17.1%), ushqimet e përgatitura, pijet dhe duhani (16.5%), produktet minerale (12.5%), produktet kimike (12%), produktet bimore (8.6%), mjetet e transportit (8.4%) dhe metalet bazë (6.4%).

Rritja më e fortë e importeve në 2025 vjen nga produktet minerale, të cilat u rritën nga 9% në 12.5% të strukturës, mjetet e transportit nga 5.6% në 8.4%, dhe produktet bimore nga 7.4% në 8.6%. Sektori i ushqimeve të përgatitura, pijeve dhe duhanit vazhdon të jetë kyç, duke zënë 19.5% të eksporteve dhe 16.5% të importeve gjatë 2025-s.

Kosova importon gati 13 herë më shumë nga Italia sesa eksporton atje. Pa ndryshim strukturor, deficitit tregtar i shtohen çdo vit rreth 38.5 milionë euro të reja.

Burim: Gazeta Express, Monitor
— Redaksia ZHURMA