Vinçi fatal në Prishtinë: Inspektorati i Kryeqytetit nuk është kompetent
Drejtori Bekim Brestovci shprehu ngushëllime pas aksidentit fatal me vinç në rrugën "Holger Petersen", ku u lëndua edhe një punëtor tjetër.
PRISHTINË — Inspektorati i Kryeqytetit sqaroi se verifikimi i sigurisë teknike të vinçit dhe kontrolli i dokumentacionit të tij janë kompetencë e Inspektoratit Qendror të Punës, jo e Inspektoratit të Kryeqytetit. Sqarimi vjen pas aksidentit fatal me vinç në një vendpunishte ndërtimore në rrugën "Holger Petersen", ku humbi jetën një punëtor dhe një tjetër mbeti i lënduar.
Drejtori i Inspektoratit të Kryeqytetit, Bekim Brestovci, shprehu ngushëllime për familjen e punëtorit të vdekur dhe uroi shërim të shpejtë për punëtorin e lënduar.
Sipas Brestovcit, legjislacioni në fuqi përcakton se verifikimi i sigurisë teknike të vinçit, kontrolli i dokumentacionit, inspektimi i pajisjes dhe mbikëqyrja e masave të sigurisë e shëndetit në punë janë kompetencë e Inspektoratit Qendror të Punës. Ky institucion verifikon nëse operatori i vinçit ka autorizimet e nevojshme dhe nëse punëdhënësi ka zbatuar standardet ligjore për sigurinë dhe shëndetin në punë.
Ndërsa, Inspektorati i Kryeqytetit, përkatësisht Inspektorati i Ndërtimit, ushtron kompetencat e veta në zbatim të Ligjit për Ndërtim: mbikëqyr zbatimin e kushteve të lejes së ndërtimit dhe përputhshmërinë e punimeve me projektin e miratuar, duke ndërmarrë masat administrative kur plotësohen kushtet ligjore.
Brestovci njoftoi se Inspektorati i Kryeqytetit do të vazhdojë bashkëpunimin me Policinë e Kosovës, Prokurorinë e Shtetit dhe Inspektoratin Qendror të Punës, për zbardhjen e plotë të rrethanave të aksidentit.
Burim: Gazeta Blic
— Redaksia ZHURMA