Si po punon Komuna në 'Xhorxh Bush' pa lejen e IKMM-së?

PRISHTINË — Buldozerët janë kthyer në sheshin "Xhorxh Bush" që nga e fundjava, dhe të enjten makineritë e rënda janë aktivizuar edhe më shumë. Asfalti po zhvishet. Komuna e Prishtinës po punon pa ndërprerje në zonën e mbrojtur të Qendrës Historike të Trashëgimisë Kulturore.

Komuna mbështetet te vendimi i Institutit të Kosovës për Mbrojtjen e Monumenteve (IKMM) i datës 14 maj, i cili ka miratuar projektin ideor për punime të infrastrukturës nëntokësore — menaxhimi i ujësjellësit dhe kanalizimit — me numër unik 3998. Por pika e fundit e atij vendimi lexohet qartë: "Ky Vendim hyn në fuqi pas aprovimit të projektit kryesor."

IKMM e ka konfirmuar për KOHA-n: "Vendimi ynë është mjaft i qartë. Pa miratim të projektit kryesor, s'ka leje për punë." Projekti kryesor i detajuar — kushti themelor ligjor — nuk i është paraqitur IKMM-së. Punimet vazhdojnë gjithsesi.

Sipas pikës tre të vendimit, i nënshkruar nga ushtruesja e detyrës Rrezarta Loxha-Vitaku, Komuna obligohej të paraqiste projektin kryesor në pesë kopje fizike nëpërmjet QRTK-Prishtinë — "si kusht themelor për fillimin e punimeve." Vendimi kërkon gjithashtu mbikëqyrje nga zyrtarët profesionalë të QRTK-Prishtinë gjatë zbatimit. Asnjëra nga këto nuk është plotësuar.

Arsyetimi i komisionit sqaron se ndërhyrjet janë "të natyrës gërmuese" dhe hapësira duhet të rrafshohej për qarkullim publik pas përfundimit. Pika dy e vendimit obligon Komunën të paraqesë "projekt-plan me dizajn dhe materializime adekuate për shtrimin e dyshemesë urbane" — dokumentacion që ende nuk është dorëzuar.

Precedenti: në mars 2025, Komuna synonte punime midis pesë monumenteve brenda zonës mbrojtëse pa asnjë leje — punimet ishin ndërprerë. Pas aplikimit, leja nuk u dha kryesisht shkaku i lokaleve komerciale të parashikuara. Në mars 2026, Komuna ka ndërruar taktikë duke dorëzuar vetëm projektin nëntokësor — por kishte marrë nga IKMM-ja vetëm rekomandime, jo miratim.

KOHA i ka dërguar pyetje kryetarit të Komunës, Përparim Rama, dhe pret përgjigje. Herën e parë buldozerët u ndalën. Tani janë kthyer — me të njëjtin pretekst, pa lejen e njëjtë.

Burim: Koha.net
— Redaksia ZHURMA