Komuna: Marrëveshje me grevistë, shkollat do të mirëmbahen

PRISHTINË — Komuna e Prishtinës ka arritur marrëveshje me punëtorët teknikë të shkollave grevistë, ndërsa puna e tyre pritet të rifillojë gjatë javës së ardhshme. Sipas njoftimit, deri në rikthimin e punëtorëve, pastrimi dhe mirëmbajtja e shkollave do të mbulohen nga Ndërmarrja Publike Banesore dhe ndërmarrja “Pastrimi”. Drejtoria e Arsimit ka theksuar se shqetësimet për higjienën në shkolla janë edhe shqetësimet e saj, ndërsa shëndeti dhe siguria e fëmijëve mbeten prioriteti.

Nxënësit e Shkollës “Ismail Qemali” në Prishtinë do të bojkotojnë mësimin e premtes për shkak të papastërtisë në shkollë. Drejtoresha Mimoza Krasniqi ka thënë se vendimi për bojkotim është marrë nga Këshilli i Prindërve pas gjendjes higjienike të rënduar në klasa dhe korridore.