Si duhet të veprojë Banka e Shqipërisë ndaj kursit të këmbimit?

TIRANË — Komisioni parlamentar për Ekonominë, Punësimin dhe Financat shqyrtoi sot projektrezolutën "Për vlerësimin e veprimtarisë vjetore të Bankës së Shqipërisë për vitin 2025", duke caktuar njëkohësisht drejtime prioritare për 2026. Relatorja e çështjes, kryetarja Milva Ekonomi, vlerësoi rolin e bankës në ruajtjen e stabilitetit financiar dhe kontrollin e inflacionit.

Direktiva kryesore ka të bëjë me kursin e këmbimit — komisioni kërkon qasje të kujdesshme, me ruajtjen e regjimit fleksibël si amortizator të goditjeve ekonomike dhe ndërhyrje vetëm kur nevojitet stabiliteti monetar ose rritja e rezervave valutore. Banka duhet të dallojë mes faktorëve kalimtarë dhe atyre themelorë në ekonomi.

Komisioni kërkon gjithashtu hartimin e një ligji të ri bankar në përputhje me standardet europiane për institucionet e kreditit dhe skemën e sigurimit të depozitave, me synim rritjen e kontributit në fondin përkatës deri në 1% të depozitave të mbuluara.

Mes prioriteteve të tjera renditen: forcimi i mbikëqyrjes ndaj ekspozimeve të mëdha kreditore — veçanërisht në sektorin e pasurive të paluajtshme, ndërtimit dhe transportit — rishikimi i kuadrit të pagesave për transaksione në kohë reale, forcimi i mbrojtjes kibernetike dhe zgjerimi i financimit për sektorë me rrezik klimatik.

Milva Ekonomi theksoi se këto masa synojnë forcimin e stabilitetit financiar, rritjen e transparencës dhe përafrimin e sistemit bankar shqiptar me standardet europiane.

Burim: ATSH
— Redaksia ZHURMA