Si e konfirmon Fox News tezën e Ramës mbi protestat Kushner?

TIRANË — Fox News, mediumi amerikan i njohur për afërsinë me Presidentin Donald Trump, ka publikuar një artikull ku pretendon se protesta kundër projektit të Kushner në Zvërnec e Sazan u fabrikua nëpërmjet dezinformimit dhe sajesave të shpërndara kryesisht në rrjetet sociale.

Duke cituar një burim anonim "të njohur me situatën," Fox News shkruan se disa nga informacionet kundër projektit "janë të sajuara dhe të falsifikuara," dhe se "disa dezinformata kanë dalë nga jashtë vendit." Artikulli nuk emëron persona, organizata apo prova konkrete për këto pretendime.

Kryeministria shqiptare iu përgjigj Fox News me një deklaratë në emër të Edi Ramës, e cila akuzon "të gjitha palët dhe individët e huaj të interesuar" për përhapur dezinformatë kundër "një projekti shumë ambicioz me potencialin për t'u bërë një model tjetër" për destinacionet turistike të brezave të ardhshëm.

Fox News i është drejtuar gjithashtu kompanisë Sazan Real Estate Development LLC, e drejtuar nga Katari. Drejtuesi i saj premtoi se projekti do të sjellë "një destinacion të klasit botëror" në bregdetin shqiptar, "të rrënjosur në dizajn të menduar mirë, kujdes mjedisor dhe mundësi ekonomike afatgjata."

Konflikti i interesit është evident: Fox News është medium i afërt me Trump, ndërkohë që Jared Kushner është dhëndër i presidentit. Artikulli konfirmon narrativën e qeverisë shqiptare se vendi "është kthyer në qendrën globale të luftës hibride" — pretendim që Rama e ka ngritur prej javësh — por pa prova të pavarura.

Ndërkohë, protestat e nisura kundër investimit Kushner tashmë kanë marrë një rrjedhë të re: demonstruesit kërkojnë dorëheqjen jo vetëm të Edi Ramës, por edhe të kreut të opozitës, Sali Berishës — duke zgjeruar qëllimin fillestar të lëvizjes, sipas Fox News.

Burim: Demokracia
— Redaksia ZHURMA