Kombëtarja U16 e Kosovës në hendboll mposht Bullgarinë në turneun rajonal
Përfaqësuesja e Kosovës U16 në hendboll për vajza ka shënuar fitore ndaj Bullgarisë në ndeshjen e parë të turneut rajonal.
Redaksia ZHURMA · · 1 min lexim
Kombëtarja U16 e Kosovës në hendboll për vajza ka nisur me fitore paraqitjen në U16 Regional Challenge Cup, duke mposhtur Bullgarinë me rezultat 26:23. Ndeshja u zhvillua në Pallatin e Rinisë në Prishtinë, ku ekipi kosovar arriti të sigurojë triumfin pas një përballjeje të luftuar deri në fund.
Natyra Arifi udhëhoqi ekipin si golashënuesja më e mirë me gjashtë gola, e ndjekur nga Jusra Begu me pesë dhe Samanda Konjuhaj me katër realizime. Kontribut të rëndësishëm dha edhe portierja Melisa Sefa, e cila regjistroi 12 pritje dhe ndali katër penallti të kundërshtareve.
Turneu do të vazhdojë me ndeshjen mes Rumanisë dhe Bullgarisë, ndërsa Kosova do të luajë ndeshjen e dytë kundër Rumanisë.
