Komandanti i KFOR-it: Nuk ka kërcënime të drejtpërdrejta në Kosovë
Pse vazhdon të flitet për tensione pavarësisht qetësisë së shpallur në veri?
PRISHTINË — Gjeneralmajori Ozkan Ulutash, komandant i KFOR-it në Kosovë, ka deklaruar në një intervistë për “Përballje Podcast” të Telegrafit se situata e përgjithshme e sigurisë në Kosovë mbetet e qetë dhe se aktualisht nuk ka tregues për kërcënime të drejtpërdrejta.
Ulutash paralajmëroi se tensionet e pazgjidhura, retorika nxitëse dhe dezinformimi vazhdojnë të paraqesin sfida që kërkojnë vigjilencë të vazhdueshme. Ai tha se KFOR-i mbetet i gatshëm të përgjigjet ndaj çdo përkeqësimi të mundshëm, duke nënvizuar se misioni është i pajisur, i trajnuar dhe i pozicionuar për reagim të shpejtë.
Për veriun e vendit, komandanti vlerësoi se gjendja është e qetë dhe nuk janë regjistruar incidente të ngjashëm me ato të vitit 2023. Megjithatë, ai theksoi se misioni nuk po e ul vigjilencën për shkak të çështjeve të pazgjidhura dhe ndikimit të mundshëm të dezinformimit dhe retorikës së papërgjegjshme.
Ai përsëriti se stabiliteti afatgjatë në Kosovë nuk arrihet përmes zgjidhjeve ushtarake, por përmes dialogut politik për normalizimin e marrëdhënieve ndërmjet Prishtinës dhe Beogradit.
Burim: IndeksOnline
— Redaksia ZHURMA