KFOR përfundon ushtrimin ushtarak për kontrollin e turmave në kampin Kelly

Misioni i KFOR-it ka përfunduar me sukses ushtrimin ushtarak të titulluar Kelly’s Heroes 2026 në kampin Kelly, ku morën pjesë ushtarë nga Gjermania, Hungaria, Italia dhe Rumania, të cilët shërbejnë në kuadër të Batalionit Rezervë Taktik të Kosovës. Në këtë stërvitje, e cila kishte në fokus procedurat për kontrollin e turmave dhe menaxhimin e trazirave, morën pjesë edhe pjesëtarë të Misionit të Bashkimit Evropian për Sundimin e Ligjit në Kosovë (EULEX).

Aktiviteti trajnues u zhvillua me qëllim rritjen e ndërveprueshmërisë, forcimin e bashkëpunimit, përmirësimin e koordinimit dhe gatishmërisë operacionale ndërmjet ushtarëve të vendeve pjesëmarrëse, si dhe harmonizimin e procedurave të përbashkëta në situata të ndërlikuara të sigurisë.

Gjatë ushtrimit u zhvilluan skenarë realistë në terren dhe nga ajri, ku u përdorën mjete tokësore dhe ajrore. Pjesëmarrësit praktikuan formacione të koordinuara, teknika të përdorimit të mburojave, transportin ajror, si dhe përdorimin e topave të ujit dhe pajisjeve të specializuara jovdekjeprurëse. Për të testuar aftësinë e misionit në skenarë kompleksë, në stërvitje u përfshinë edhe teknologji moderne, si dronët dhe sistemet kundër dronëve.

Sipas njoftimit zyrtar të KFOR-it, komandantët kanë vlerësuar profesionalizmin, vetëdijen për situatën dhe frymën ekipore të treguar nga njësitë pjesëmarrëse. Misioni theksoi se përfundimi i këtij ushtrimi dëshmon përkushtimin për ruajtjen e gatishmërisë operacionale dhe siguron koordinim efektiv ndërmjet pjesëtarëve nga më shumë se 30 shtete aleate dhe me partnerët e NATO-s.

KFOR-i bëri me dije se mbetet garantues i qëndrueshmërisë në Kosovë për të siguruar një mjedis të sigurt e të qetë për të gjithë qytetarët dhe lirinë e lëvizjes për të gjitha komunitetet, në përputhje me mandatin e tij afatgjatë të Kombeve të Bashkuara dhe në koordinim me Policinë e Kosovës dhe EULEX-in.