KDI: Muaji i parë i punës së Legjislaturës së XI-të, kaotik në planifikim

Instituti Demokratik i Kosovës ka publikuar raportin me titull «Kuvend pa rend! Organizimi dhe planifikimi i punës së Kuvendit në Legjislaturën e re», i cili analizon punën mujore të Kuvendit të Kosovës me fokus në planifikimin dhe organizimin e aktiviteteve parlamentare gjatë muajit të parë të Legjislaturës së XI-të.

Sipas njoftimit të KDI-së, fillimi i punës së legjislaturës së re u karakterizua nga mungesa e një plani të integruar që do të përcaktonte prioritetet, afatet dhe koordinimin e aktiviteteve të Kuvendit, ndërkohë që kjo situatë vjen pas gati dy vitesh krizash institucionale dhe pa Kuvend funksional ku pritjet e qytetarëve ishin për një dinamikë ndryshe të agjendës legjislative.

Hulumtuesja Violeta Haxholli theksoi se Kuvendi e ka të domosdoshme një planifikim të integruar duke vendosur prioritete të qarta, afate të matshme dhe duke shfrytëzuar përparësitë që ofron teknologjia informative dhe inteligjenca artificiale për riorganizimin e punës, ndërsa shtoi se agjenda legjislative e sjellë nga Qeveria mbetet përcaktuese në planifikimet e Kuvendit.

Sipas analizës së paraqitur në konferencë, komisionet parlamentare pa një analizë të kompleksitetit apo volumit të agjendës qeveritare, e cila vetëm për tre muaj ka paraparë 65 projektligje, po e bartin këtë agjendë në planet e tyre të punës, ndërsa Programi Legjislativ për periudhën tetor-dhjetor parasheh procedimin e 52 projektligjeve dhe 13 marrëveshjeve ndërkombëtare, ku vetëm për muajin tetor ishin planifikuar 30 nisma.

Haxholli bëri të ditur se asnjë komision parlamentar nuk ka përfshirë ndonjë iniciativë të re që buron nga vetë deputetët për ligje të reja, ndërsa nga 14 planet e komisioneve të analizuara, vetëm pesë prej tyre kanë paraparë aktivitete për mbikëqyrjen e zbatimit të ligjeve në vend.

Gjithashtu, raporti evidenton anomali në shpërndarjen e pabarabartë të punës për deputetë, ku disa prej tyre kryesisht të partive të vogla janë njëkohësisht anëtarë në dy, tre apo katër komisione, ndërsa 10 deputetë të Kuvendit nuk janë pjesë e asnjë komisioni parlamentar.

Gjatë muajit tetor janë regjistruar tri raste kur oraret e mbledhjeve të komisioneve ishin caktuar në të njëjtën kohë dhe 20 raste të tjera brenda intervaleve shumë të shkurtra, ndërsa organizimi është vështirësuar edhe nga moskompletimi i përbërjes së tyre për shkak se deputetët e propozuar nga Lista Serbe nuk ishin emëruar në komisione.

Në aspektin e mbështetjes administrative, KDI theksoi se pesë zyrtarë mbulojnë nga dy komisione, ndërsa shtatë komisione kanë koordinatorë me ushtrues detyre, kurse sa i përket punës së Kuvendit gjatë tetorit u mbajtën gjashtë seanca, prej tyre tri plenare dhe tri të jashtëzakonshme, ku u shqyrtuan 10 projektligje në lexim të parë, u miratuan tetë në lexim të dytë dhe katër marrëveshje ndërkombëtare, ndërsa komisionet parlamentare mbajtën 59 mbledhje, prej të cilave tri nuk u zhvilluan.