Kay: Parashikimi me shkronjën A nxiti kërkimet e Dianës për t'u shpërngulur me Khanin

Princesha Diana kërkoi të niste një jetë të re jashtë vëmendjes mediatike me kirurgun pakistanez të zemrës, Hasnat Khan, duke udhëtuar drejt Australisë dhe Afrikës së Jugut pas një parashikimi se do të jetonte në një shtet që nis me shkronjën «A». Gazetari Richard Kay risjell prapaskenat e këtyre udhëtimeve dhe përpjekjet e saj për të ndërtuar një familje me Khanin.

Pas përfundimit të divorcit nga atëherë Princi Charles, Diana u njoh me kirurgun kardiak Hasnat Khan në spitalin Royal Brompton në Londër, ku ai po mjekonte një mikeshë të saj. Lidhja e tyre u bë më serioze dhe princesha nisi të mendonte për martesë. Megjithatë, të dy kishin shqetësime për të ardhmen, pasi ajo druhej se statusi i saj mbretëror dhe fama ndërkombëtare do të pengonin karrierën e tij, ndërsa Khan mendonte se vëmendja e shtypit do të dëmtonte synimet e tij si mjek. Në atë periudhë, Diana konsultohej shpesh me astrologë dhe mediume për jetën personale. Ndër to ishte edhe Rita Rogers, një grua me origjinë rome nga Derbyshire, të cilën princesha e konsideronte ndër njerëzit më të besuar.

Në një telefonatë ku i rrëfeu pasiguritë e saj, Rogers i tha Dianës se e shihte çiftin së bashku në të ardhmen në një vend të huaj, me një emër që fillonte me shkronjën «A». Fillimisht Diana mendoi për Amerikën ku besonte se do të gjente qetësi, por më pas shqyrtoi Australinë. Në nëntor të vitit 1996, ajo udhëtoi në Sidnei për vizitën e saj të parë zyrtare jashtë vendit pas divorcit. Australia e tërhiqte sepse Khani kishte kaluar atje një pjesë të formimit profesional dhe i kishte folur me nostalgji për të. Diana vizitoi edhe repartin e kardiologjisë ku ai kishte kryer një pjesë të trajnimit. Por ky shtet u skualifikua pasi largësia nga djemtë e saj, William dhe Harry, përbënte pengesë të pakapërcyeshme.

Një tjetër mundësi mbetej Afrika e Jugut, ku jetonte vëllai i saj Charles Spencer me katër fëmijët e tij. Vendi lidhej edhe me kirurgun e transplantit të zemrës, Dr. Christiaan Barnard, të cilin Diana e kishte takuar në një aktivitet bamirësie në Rimini të Italisë. Ajo e pyeti nëse Khan mund të punësohej në sistemin shëndetësor atje dhe Barnardi i premtoi ndihmë. Në spitalin Groote Schuur në Cape Town, jo larg banesës së Spencerit, Dr. Barnard kishte kryer transplantin e parë të suksesshëm të zemrës.

Në vitin 1997, Diana udhëtoi drejt Cape Town dhe qëndroi tri net te i vëllai. Gjatë kësaj vizite ajo shqyrtoi blerjen e një shtëpie, vizitoi plazhet e vreshtat, kaloi kohë me nipin e mbesat dhe u takua me presidentin e atëhershëm Nelson Mandela për të diskutuar planet kundër përhapjes së AIDS-it në Afrikën Subsahariane. Ndonëse Dr. Barnard i kishte lënë mesazhe për mundësitë e punësimit të Khanit, vizita nuk e bindi princeshën se Afrika e Jugut ishte vendi i duhur për të ardhmen e saj.