Skemë mashtrimi për vizat e talenteve në Britani

Një skemë që synon të tërheqë artistët dhe profesionistët më të talentuar në Britaninë e Madhe po shndërrohet në një instrument mashtrimi, ku vepra arti të papunuara nga aplikantët, ekspozita artificiale dhe artikuj të rremë përdoren për të siguruar vizën britanike. Kompani konsulence në Mbretërinë e Bashkuar dyshohet se ndihmojnë emigrantët të paraqiten rrejshëm si ekspertë të teknologjisë dhe artistë për të përfituar përmes skemës së përshpejtuar të emigracionit Global Talent. Gjatë një hetimi, një përfaqësues i një kompanie konsulence në Londër i ofroi një gazetari të paraqitur si klient një paketë shërbimesh me vlerë mbi 100 mijë paund, e cila përfshinte vepra arti të prodhuara në Kinë, ekspozita, publikime dhe letra rekomandimi, duke pretenduar se klientët e kësaj pakete nuk kishin pasur kurrë aplikime të refuzuara.

Ministria e Brendshme britanike, Home Office, i cilësoi zbulimet si jashtëzakonisht serioze dhe konfirmoi se kompania në fjalë është tashmë nën hetim, ndërkohë që janë nisur procedurat për revokimin e vizave të dy shtetasve nigerianë që kishin aplikuar si fotografë të arteve të bukura përmes artikujve të falsifikuar në internet. Një zëdhënës i institucionit deklaroi se skema Global Talent është në proces rishikimi dhe se ministrja e Brendshme do të marrë çdo masë të nevojshme për të parandaluar abuzimet, ndërsa aplikantët përfitojnë mundësinë për të marrë familjarët dhe për të aplikuar për qëndrim të përhershëm pas tre ose pesë vitesh.