DJ Khaled humbi rreth 40 kilogramë gjatë vitit të kaluar

Producenti amerikan i muzikës, DJ Khaled, ka njoftuar se ka humbur rreth 40 kilogramë gjatë vitit të kaluar, pasi më parë peshonte midis 134 dhe 136 kilogramë. Pika e kthesës për të ndryshuar stilin e jetës erdhi në tetor të vitit të kaluar gjatë një koncerti, kur ai nuk mundi të ngrihej lehtë në këmbë pasi ishte gjunjëzuar për të shprehur mirënjohje. «Ka një pjesë të performancës sime ku gjunjëzohem dhe them faleminderit, tregoj mirënjohjen time», tha Khaled, duke shtuar se miqtë e tij e kishin vënë re se po merrte frymë me vështirësi.

Pasi u konsultua me një mjek, ai nisi përdorimin e ilaçit Wegovy për humbje peshe nga grupi GLP-1, të cilit ia atribuon 34 kilogramët e humbura gjatë vitit të kaluar. Planin e tij të ri ai e ka pagëzuar si «Ecje, Golf dhe Wegovy», duke luajtur golf deri në gjashtë herë në javë, duke përshkuar të 18 vrimat në këmbë pa përdorur karrocë dhe duke bërë mbi 10,000 hapa në ditë. «Jam shumë më i shëndetshëm. Kam më shumë energji. Jam më i motivuar për gjithçka», u shpreh ai, duke përmendur gjithashtu djemtë e tij si motivim kryesor: «Ne jetojmë për fëmijët tanë dhe fëmijët tanë na bëjnë të jetojmë».

Në të kaluarën, Khaled ka qenë edhe ambasador i programit Weight Watchers në vitin 2018, ndërsa tani synon që ta ulë peshën e tij deri në 91 kilogramë.