Pse e kritikon Kamberi memorandumin e studentëve serbë për Kosovën?
Deputeti shqiptar në Kuvendin e Serbisë kritikon memorandumin e studentëve protestues që e konsideron Kosovën pjesë të patjetërsueshme të Serbisë.
BEOGRAD — Deputeti shqiptar në Kuvendin e Serbisë, Shaip Kamberi, ka deklaruar se pavarësisht ndryshimeve të mundshme politike në Serbi, vendi vazhdon të mbetet i lidhur me politika militariste, kolonialiste dhe hegjemoniste ndaj fqinjëve, veçanërisht ndaj Kosovës.
Kamberi ka përmendur si shembull të fundit një "memorandum të ri për Kosovën" nga studentët protestues në Serbi. Ai tha se dokumenti tregon se alternativa politike pas presidentit serb Aleksandar Vuçiq nuk duket shpresëdhënëse, sidomos në aspektin e demokratizimit të vendit.
"Pushteti i Aleksandar Vuçiqit i zhytur në llum, krim, korrupsion dhe me prirje fashiste ndaj të tjerëve, duhet të largohet — kjo nuk ka diskutim. Por po aq e qartë është se Serbia, pavarësisht ndryshimeve politike që mund të ndodhin, ende nuk po arrin të shkëputet nga politika e saj militariste, kolonialiste dhe hegjemone ndaj fqinjëve, veçanërisht ndaj Kosovës", ka shkruar ai në Facebook.
Kamberi ka shtuar se ambiciet kolonialiste të Serbisë vazhdojnë të pengojnë edhe perspektivën evropiane të Ballkanit Perëndimor.
Studentët serbë që po protestojnë kundër regjimit të Vuçiqit kanë publikuar një memorandum të dielën në Kragujevc, ku Kosovën e cilësojnë si pjesë të patjetërsueshme dhe integrale të Serbisë. Sipas dokumentit, "Kosova dhe M. nuk janë thjesht territor, por përbërës i identitetit kombëtar serb", ndërsa përmenden monumentet fetare ortodokse në Prizren, Pejë dhe Graçanicë si pjesë e trashëgimisë "shpirtërore dhe kulturore serbe".
Burim: Koha.net, https://www.koha.net/arberi/kamberi-memorandumi-i-studenteve-per-kosoven-tregon-vazhdimesine-e-politikave-te-vjetra-ne-serbi
— Redaksia ZHURMA