Kallëzim penal ndaj drejtorit në Shkup për 110 mijë euro të përvetësuara

SHKUP — Prokuroria për Krim të Organizuar dhe Korrupsion ka pranuar një kallëzim penal që ngarkon me përgjegjësi një drejtor nga Shkupi, i identifikuar si I.S., si dhe një subjekt juridik, nën dyshimet për kryerjen e veprave që lidhen me pastrimin e parave dhe të ardhurave të tjera nga veprat penale. Sipas njoftimeve zyrtare, bëhet fjalë për shkelje financiare që kapin vlerën e 110.000 eurove, të cilat nuk janë kaluar në buxhetin e shtetit si detyrime nga regjistrimi i automjeteve.

Gjatë periudhës nga fillimi i vitit 2021 deri në muajin janar të vitit 2026, drejtori i dyshuar ka shfrytëzuar autorizimin për kontrolle teknike të automjeteve për të siguruar dobi pasurore të kundërligjshme në vlerë prej 6.803.900 denarësh. Ai së bashku me personin e autorizuar S.S. kanë përgatitur raporte të rreme që janë dorëzuar në institucione të ndryshme, përfshirë Ndërmarrjen Publike “Rrugët Shtetërore”, komunat, Ministrinë e Mjedisit, Kryqin e Kuq dhe Këshillin Republikan për Sigurinë në Komunikacionin Rrugor.

Sipas kallëzimit, fondet e arkëtuara janë fshehur përmes dy personave juridikë dhe një kompanie ndërmjetësimi sigurimesh. Paratë janë transferuar nga një llogari në tjetrën dhe janë përzier me të ardhura nga veprimtaria e rregullt, ndërsa një pjesë e tyre është përdorur për blerjen e pasurive të luajtshme e të paluajtshme në dobi të personit juridik të denoncuar.