Interi arrin marrëveshje verbale me John Stones, të lirë nga City

MILANO — Interi ka arritur një marrëveshje verbale me mbrojtësin anglez John Stones, 32 vjeç, i cili pritet të bashkohet me skuadrën zikaltër pas largimit pa transferim nga Manchester City. Oferta e klubit italian parashikon një kontratë dyvjeçare, me pagë rreth 4 milionë euro në sezon. Detajet përfundimtare të marrëveshjes ende po përcaktohen, por Interi është gati të mbyllë operacionin.

Stones u rrit te Barnsley dhe u afirmua te Everton, para se të transferohej te Manchester City në vitin 2016, ku fitoi gjashtë tituj të Premier League dhe Ligën e Kampionëve në 2023 nën drejtimin e Pep Guardiolës. Në finalen e asaj edicioni ndaj vetë Interit, në Stamboll, anglezi luajti edhe në një rol më të avancuar në mesfushë, pozicion që e ka provuar disa herë gjatë karrierës.

Te Interi, mbrojtësi anglez pritet të zërë hapësirën e krijuar në qendër të mbrojtjes pas largimit të Francesco Acerbit, duke u parë si një alternativë me përvojë për repartin defensiv zikaltër. Plani i klubit është t'i japë Stones një rol të rëndësishëm në formacion, ndërsa Manuel Akanji mund të zhvendoset në krahun e djathtë të mbrojtjes dhe Alessandro Bastoni të vazhdojë si titullar; Yann Bisseck mbetet një tjetër opsion.

Ndërkohë, Interi po largohet nga pista për mbrojtësin argjentinas Cristian Romero, pasi kërkesat financiare të tij dhe të Tottenhamit konsiderohen shumë të larta nga klubi italian.

Burim: Ora News
— Redaksia ZHURMA