Tërhiqen nga tregu produktet e 9 kompanive me yndyrë bimore

PRISHTINË — Inspektorati Qendror i Mbikëqyrjes së Tregut (IQMT), në kuadër të zbatimit të vendimeve të institucioneve kompetente, ka nisur sot largimin nga tregu të të gjitha produkteve të deklaruara në etiketim se përmbajnë yndyrë me origjinë bimore, si vaj palme dhe vaj kokosi, pasi Agjencia e Ushqimit dhe Veterinarisë (AUV) e urdhëroi tërheqjen e tyre menjëherë.

Gjatë ditës së sotme, AUV ka urdhëruar nëntë kompani që të tërheqin nga tregu produktet e tyre të deklaruara me yndyrë me origjinë bimore. Për të verifikuar zbatimin e kësaj urdhërese, IQMT ka filluar në orët e pasdites aksionin e inspektimeve në marketet e kategorisë B dhe C, me qëllim identifikimin dhe largimin e produkteve nga ekspozimi dhe shitja.

Kompanitë e urdhëruara janë: „Drena“ SHPK, „Bylmeti KS“ SHPK, „Koral Dayri“ SHPK, „Magic Ice Joint Stock“ SH.A, „Opatija Comerc“ SHPK, Qumështorja „Aldi“, „Gexha“ SHPK, „Abi“ SHPK dhe „Natyra – G“ SHPK. Subjektet e lartpërmendura janë urdhëruar të ndërpresin menjëherë aktivitetin e përpunimit dhe paketimit të produkteve që përmbajnë yndyrë me origjinë bimore, si dhe të largojnë nga ekspozimi dhe shitja të gjitha produktet kompozite të përfshira në këtë masë.

Ndërkohë, për produktet e kompanisë Abrazen – Vita, procesi i inspektimit ende është në zhvillim dhe nuk ka urdhër largimi ende. Subjektet e larta janë paralajmëruar të ndërpresin aktivitetin e paketimit deri në përfundimin e procedurës.

Ministria e Industrisë, Ndërmarrësisë, Tregtisë dhe Inovacionit (MINTI) përmes Inspektoratit Qendror të Mbikëqyrjes së Tregut do të vazhdojë monitorimin e zbatimit të këtyre masave në të gjithë territorin e Republikës së Kosovës dhe do të ndërmarrë veprime me legjislacionin në fuqi ndaj çdo subjekti që nuk respekton urdhërat e institucioneve kompetente. MINTI mbetet e përkushtuar në mbrojtjen e konsumatorit, garantimin e zbatimit të ligjit dhe sigurimin e një tregu të drejtë dhe të sigurt për qytetarët.

Burim: Tetova Sot
— Redaksia ZHURMA